Топ новости
Жыл соңына дейін Қазақстанға $1 млрд-ға 37 компания қоныс аударуы мүмкін, деп хабарлайды LS.
Ұлттық экономика вице-министрі Бауыржан Құдайбергенов ірі шетелдік құрылымдардың Қазақстанға көшуі туралы сұрақтарға жауап берді.
"Бүгінгі таңда капиталдандыруы шамамен $1 млрд болатын 37 компанияны орналастыру бойынша жұмыс жүргізілуде, бірақ бұл көрсеткіш әр уақытта өзгеріп отырады, сондықтан нақты ақпаратты атау қиын. Бұл қандай компаниялар екендігі туралы жұмыс қорытындысы бойынша қосымша ақпарат береміз", – деді ол.
Мерзімдерге келетін болсақ, олар әр компания үшін әр түрлі, деп қосты вице-министр.
"Жыл соңына дейін біз жұмысты аяқтауымыз керек. Мен барлығы 37 компания болады деп айта алмаймын. Бұдан аз немесе көп болуы мүмкін. Жыл соңына дейін бұл жұмыс атқарылады. Компанияларда нақты сұраныстар бар және олар бойынша жұмыс істейміз. Мысалы, біреуі тек жер учаскесін сұрайды, екіншісі – артықшылықтары мен жеңілдіктеріне мән береді" – деп түсіндірді ол.
Ол сондай-ақ, компанияның деректері қандай салаларда жұмыс істейтіні туралы сұраққа жауап берді.
"Бізде өңдеу өнеркәсібі, IT-компаниялар, цифрландыру, сондай-ақ, тау-кен өнеркәсібі бойынша басым бағыттар бар", – деп жауап берді Құдайбергенов.
Бұл ретте тізімде 30-дан астам елден 400 компания бар, деп нақтылады ол. Оның айтуынша, елге құны $1,5 млрд-дан асатын 41 компания келді. Оның ішінде TikTok, inDriver және т. б. бар.
Бұған дейін, LS редакциясы Алматыда қандай шетелдік компаниялардың қоныстанғаны туралы хабарлаған болатын.
