Азнакай районы алдынгы җитештерү һәм экологик чишелешләрне гамәлгә кертү мәйданчыкларының берсе булып кала. Бу хакта Татарстан Рәисе Рөстәм Миңнеханов бүген «Азнакайнефть» нефть-газ табу идарәсенең 70 еллыгын һәм Азнакай районының 95 еллыгын бәйрәм итүгә багышланган тантаналы чарада белдерде.

Республика Рәисен Азнакай районы башлыгы Марсель Шәйдуллин озата йөрде.

Төп тантаналы чаралар Азнакайның «Юбилейный» стадионында узды. Рөстәм Миңнеханов билгеләп үткәнчә, зур нефть килү белән район тарихында яңа бит ачылды. Бу еллар эчендә Идарә 522 млн тонна нефть чыгарган. Бүген "Азнакайнефть" 4800 скважина эксплуатацияли, шуларның унысы һәрберсе миллион тоннадан артык нефть биргән.

"Әлбәттә, "Азнакайнефть" нең төп байлыгы — кешеләр. Нефть ятмаларын үзләштергән, җитештерү базасын булдырган, коллективның һөнәри традицияләрен формалаштырган ветеран-нефтьчеләргә аерым рәхмәт сүзләре. Аларның уникаль тәҗрибәсен нефтьчеләрнең яңа буыннары үзләреннән алда килгәннәрнең эшен лаеклы дәвам итеп үзләштерә", — диде республика Рәисе.

Ул билгеләп үткәнчә, бүген район территориясендә алдынгы экологик инициативалар гамәлгә ашырыла. Мәсәлән, Актүбә бистәсе нигезендә энергияне нәтиҗәле кулланучы автономияле экологик җирлек — Актүбә проекты үсеш ала. Аның нигезе — йомык цикллы икътисад: калдыклар чималга әверелә, ә җирле биоресурслар җылылык һәм электр энергиясе алу өчен файдаланыла. "Актүбә заманча экологик һәм технологик алымнарны куллануның гамәли үрнәгенә әверелә. Мондый проектларны гамәлгә ашыру — нефтьчеләрнең Азнакай районы белән күпьеллык хезмәттәшлеген дәвам итү", — дип ассызыклады Рөстәм Миңнеханов.

Ул билгеләп үткәнчә, дистә еллар эчендә нефть тармагы районның бүгенге йөзен формалаштырды. Җитештерү объектлары белән бергә торак, мәктәпләр, мәдәният һәм спорт учреждениеләре төзелде, торак пунктлар төзекләндерелде.

“70 ел эчендә "Азнакайнефть" район тарихының аерылгысыз өлешенә һәм Татарстанның нефть сәнәгате терәкләренең берсенә әверелде. Идарә коллективын, нефть тармагы ветераннарын һәм Азнакай районында яшәүчеләрне әлеге истәлекле даталар һәм Россия Федерациясе Дәүләт флагы көне белән котлыйм!" — диде Рөстәм Миңнеханов.

Аннары ул Азнакай районының атказанган нефть-газ сәнәгате хезмәткәрләренә һәм ветераннарына дәүләт бүләкләре тапшырды.

Азнакайга эш сәфәре кысаларында Рөстәм Миңнеханов Р.Ишкаев исемендәге яңартылган паркта булды. Реконструкция барышында җәяүлеләр маршрутлары төзекләндерелде, яңа аттракционнар, фонтан төзелде, ясалма сулык төзекләндерелде, балалар мәйданчыгы җиһазландырылды. Татарстан Рәисе яңартылган шәһәр киңлеген карап чыкты, шулай ук «Мәктәпкә җыенырга ярдәм ит» акциясе кысаларында булачак беренче сыйныф укучыларына портфельләр тапшырды. 20 бала канцелярия товарлары тулы комплектлы мәктәп портфельләрен алды.

/Татарстан Рәисе матбугат хезмәте